ken, la sina pilin e ni: mi ken pana e sona ni, kepeken pali lili. taso, sina li ken ala. ni li, tan seme?
jan Georg Cantor (Kejo Kanto) li pilin e ni: poki li poki. poki li ken jo e ijo ale, tan wile sina. ale li pona. ken, la sina pilin sama. taso, pilin ni li nasa mute. ni li nasa, tan seme? jan Bertrand Russell (Petan Wase) li sona e ni: poki li ken jo e ijo ali, la ona li ken jo e poki. ni, la jan Russell li lon e poki $W$.
poki seme li lon poki $W$? o kama jo e poki. poki seme? sona ni li suli ala. o pana e nimi $A$ tawa poki sina. mi wile sona e ni: poki $W$ li jo ala jo e poki $A$? poki $W$ li jo e poki seme? mi ken sona, kepeken toki anpa:
jan Russell li wile sona e ni: poki $W$ li jo ala jo e poki $W$?
mi o toki sin e ona, kepeken mute nimi lili. jo, la jo ala. jo ala, la jo. ona li nasa wawa mute a! ni, la poki li ken ala jo e ijo ale, tan wile mi. pilin pi jan Cantor li pakala.
mi wile e toki suli lawa. toki suli lawa li seme? ona o pana e sona ni: poki, la poki li ken ala ken lon. mi wile e ona, tan ni: poki $W$ o ken ala lon.
jan Gottlob Frege (Kolo Peke) li alasa e toki ni. taso, ona li pakala tan ni: jan Russell li sona e ni: toki suli lawa pi jan Frege li toki e ni: poki $W$ li ken lon.
jan Ernst Zermelo (An Samelo) li alasa sin e toki ni. ona li lon e toki suli lawa pona.
mi pana sona e toki suli lawa tan jan Zermelo lon lipu ni.
mi wile kepeken e sitelen sin. o pana e toki ni, tawa lawa sina:
toki $A$ li lon, la mi toki e ni: "$P$ la $Q$." kin, la mi sitelen e ni:
$$P \implies Q$$ $$Q \Longleftarrow P$$toki $B$ li lon, la mi toki e ni: "$Q$ la $P$." kin, la mi sitelen e ni:
$$Q \implies P $$ $$ P \Longleftarrow Q$$toki tu li lon, la mi toki e ni: "$P$ la $Q$. kin, la ante." kin, la mi sitelen e ni: $$P \iff Q$$
toki $P$ li lon, la mi toki e ni: $P$. kin, la mi sitelen e ni: $P$
toki $P$ li lon ala, la mi toki e ni: "$P$ ala." kin, la mi sitelen e ni: $\lnot P$
toki ale pi nimi ante li sama.
mi wile sona e ni: toki $P$ ale en tenpo ale, la toki ni li lon ala lon?: $P$ anu $\lnot P$
nimi pi toki ni li lawa pi meso ala. ken, la sina pilin e ni, kepeken pali lili: lawa ni li sona, lon tenpo ale. taso, mi wile, la mi kepeken anu kepeken ala e lawa ni. ale li pona. lawa pi meso ala li pona tawa kulupu jan pi sona nanpa. taso, ona li ike tawa kulupu jan lili ante pi sona nanpa, tan ni: tenpo mute, la lawa ni li toki e ni: "ijo li lon. taso, mi ken ala pana e ona tawa lukin sina."
mi sona ala e pilin mi. taso, mi kepeken e lawa pi meso ala, tan ni: mi pali lili kepeken lawa ni. mi kepeken ala, la mi pali mute. taso, mi wile ala pali. ni, la mi kepeken e ona. jan pi sona nanpa mute li kepeken e lawa ni, tan sama. jan pi sona nanpa li lape.
ijo ante, la mi sona e ni: tenpo ale, la toki ni li lon: $\lnot (P \text{ en } \lnot P)$. ni li lawa pi nasa ala. poki pi jan Russell li ike tawa mi tan ni: ona li utala e lawa pi nasa ala kepeken ni: ona li jo li jo ala e sama.
lawa ante pi nasin sona li weka. tenpo kama, la mi pana e ona.
tenpo ni, la mi ken pana e sona ni:
toki ale $P$, la $\lnot \lnot P \iff P$.
tan sona li ni: nanpa wan, la mi toki e ni: $P \implies \lnot \lnot P$. mi sona e ni tan seme? o pilin e ni: $P$ li lon. mi sona e ni: $P$ anu $\lnot P$ li lon, tan lawa pi meso ala. $P$ li lon, la $\lnot P$ li lon ala, tan lawa pi nasa ala. ni, la $\lnot \lnot P$ li lon. nanpa wan li pini.
nanpa tu, la mi toki e ni: $\lnot \lnot P \implies P$. mi sona e ni tan seme? o pilin e ni: $\lnot \lnot P$ li lon. ni, la $\lnot (\lnot P)$ li lon. ni, la $\lnot P$ li lon ala, tan ni: $(\lnot P)$ anu $\lnot (\lnot P)$ li lon, tan lawa pi meso ala. $P$ anu $\lnot P$ li lon kin, tan lawa pi meso ala. taso, $\lnot P$ li lon ala. ni, la $P$ li lon, tan lawa pi nasa ala. mi pini. $\square$